إندرايف بالمغرب.. طلع تاكل الكرموس هبط شكون قالها ليك؟!
مكتب القنيطرة/عزيز متوشي
دولة كتخلي الإشهارات ديال تطبيقات النقل تنتشر عبر وسائل الإعلام عبر إذاعي راديو ومواقع التواصل الاجتماعي، والمواطن كيشوف هاد الإعلانات وكيعتقد أن الخدمة قانونية، فيقرر يخدم باش يضمن لقمة العيش ديالو.
ولكن ملي كيخرج يخدم، كيقدر يلقى راسو أمام مراقبة أمنية، ومحضر مخالفة، ومتابعة أمام المحكمة، وغرامة، إذا ثبتت مخالفة قانونية. “ورجل الامن له حق”
وهنا كيبان التناقض اللي كيطرح أسئلة كثيرة: إلى كان النقل عبر التطبيق مخالفاً للقانون في الحالة المعنية، علاش المواطن كيتشجع عليه بالإشهار؟ وإلى كان مسموحاً به بشروط، علاش ما تكونش هاد الشروط واضحة للجميع؟
واش المواطن خاصو يعرف القانون بوحدو، ولا الجهات المعنية خاصها توضح ليه شنو مسموح وشنو ممنوع قبل ما يخاطر براسو وبفلوسو؟
ماشي معقول يبقى المواطن تايه بين الإشهار، والبحث عن لقمة العيش، والخوف من المخالفة.
طلع تاكل الكرموس هبط شكون قالها ليك؟!
المطلوب هو الوضوح القانوني، وتحديد المسؤوليات، وحماية المواطن من الوقوع في مشاكل بسبب الغموض. فالتنظيم الحقيقي ماشي هو غير تحرير المخالفات، بل حتى توضيح القواعد وتطبيقها بشكل عادل على الجميع.
