بالدارجة: فجيج ماشي قرية في الخلا… فجيج هي الثقافة بحد ذاتها..، ردا على تصريح أميمة رشدي
قاسم حدواتي
بلاد الثقافة والمثقفين ترد، وكفى استصغارا بأهل الجنوب الشرقي، فاش كنا كنتفرجوا فبرنامج نقطة إلى السطر على 2M، خرجات علينا الأستاذة أميمة رشدي بتصريح صادم، قالت فيه بالحرف:
حيت واحد السيد كيسكن ففكيك ولا كيسكن فزاكورة صعيب عليه يفهم هادوك الوثائق لي كتحط وزارة المالية..
لا حول ولا قوة إلا بالله، هكذا بكل بساطة، سكان فجيج وزاكورة ولى عندهم مشكل في الفهم؟
بغينا نقولو للأستاذة المحترمة، راكي غالطة، وغالطة بزاف.
أولا، شكون هي فجيج اللي كتهضري عليها؟
فجيج اللي كتهضري عليها باستهزاء، هي الواحة الوحيدة في المغرب اللي فيها 7 قصور، 7 قصور بالعلم ديالها، بالمساجد ديالها، بمكتباتها.
فجيج هي اللي صدرات للمغرب والعالم، أطباء، مهندسين، أساتذة جامعيين، أدباء وشعراء كتبوا بالعربية والأمازيغية والفرنسية، مناضلين كبار من جيش التحرير، هي المدينة اللي نسبة التمدرس فيها من أعلى النسب وطنيا، ونسبة الأمية من أقل النسب.
فجيج اللي كتقولي عليها صعيب يفهم هي نفسها اللي ولادها كيفكوا شفرات الميزانية العمومية قبل ما وزارة المالية تنشرها.
أولاد فجيج راهم هما اللي خدامين في وزارة المالية نفسها اللي كتدافعي على تبسيط وثائقها!
وزاكورة نفس الشي، بلاد 360 قصبة، بلاد العلماء، بلاد القوافل اللي قرّات إفريقيا التجارة والدين.
ثانيا، واش غير اللي ساكن في الرباط وكازا هو اللي ذكي؟
واش الوطنية كتتقاس بـ GPS؟
المواطن الفجيجي ما خاصوش تبسيط لأنه ما كيفهمش، المواطن الفجيجي خاصو احترام، وخاصو المعلومة توصل له لأنه بعيد جغرافيا، ماشي بعيد ذهنيا.
هناك فرق كبير بين صعوبة الوصول للمعلومة و “صعوبة الفهم، وأنت خلطتي بيناتهم.
ثالثا، كتبت بالدارجة باش تفهمينا مزيان وا الأستاذة أميمة،
بغينا نقولوا لك واحد الحاجة بدارجتنا ديال فجيج:
حنا في فجيج نقراوا الكتاب من عنوانه، ونقراوا الميزانية من أرقامها، ونقراوا بنادم من عينيه.
حنا اللي حفظنا النخل وعلمناه يصبر 300 عام، غادا تجي تقولي لينا ما كنفهموش ورقة PDF حاطاها وزارة المالية؟
حنا ولاد اللي بناوا السواقي تحت الأرض باش الماء يوصل لكل قصر بالتساوي، قبل ما يخترعوا العدالة المجالية ديالكم. حنا اللي عندنا أقدم نظام جماعي ديمقراطي في المغرب جماعة فجيج، قبل ما تولي الموضة ديال الديمقراطية التشاركية.
ضحكتينا الله يعطيك الخير، فجيج اللي خرجات قضاة في المجلس الأعلى، ولى صعيب عليها تفهم وثيقة؟
رابعا، أين نائبنا البرلماني السيد عبد القادر الذي بدأ بقوة ؟
وهنا كانوجهوا رسالة مباشرة للسيد النائب دون غيره لاحقاش كيبان مع بداية الولاية بدا بقوة كما كيروج له، وتقدم بـ 11 سؤال كتابي.
11 سؤال كتابي سيادة النائب، وما سمعنا حتى حس على إهانة علنية لإقليمك كاملا في قناة عمومية يشاهدها الملايين؟
إقليم فجيج و زاكورة ليسوا مجرد أرقام في أسئلة كتابية عن الماء والطريق، إقليم فجيج كرامة. والكرامة كتستدعي تدخل فوري.
ننتظر منك:
1. سؤال شفوي لوزير الثقافة والتواصل حول هذا الخطاب التمييزي الجهوي في قناة عمومية.
2. بيان استنكار باسم ساكنة الإقليم.
3. مراسلة رسمية للهاكا والمجلس الوطني لحقوق الإنسان.
أما إذا كانت البداية القوية هي فقط أسئلة مكتوبة، فاسمح لنا نقول لك، فجيج تستاهل بداية أقوى من هكا.
المطلب ديالنا واضح
نحن، أبناء وبنات إقليم فجيج، مثقفوه، شبابه، وشيوخه، نطالب:
. باعتذار رسمي وعلني من الأستاذة أميمة رشدي على نفس المنبر الذي قالت فيه تصريحها.
.باعتذار من قناة 2M التي سمحت بمرور خطاب فيه تمييز مجالي واضح.
فجيج بلاد الثقافة والمثقفين، فجيج بلاد العلم، فجيج اللي إلا دخلتي لها خاصك تحني راسك احتراما لتاريخها.
ومن اليوم، أي واحد بغا يضرب المثل بالجهل، ما يبقاش يقول فجيج وزاكورة… صعيب يفهم بحال اللي ما قراش تاريخ فجيج”.
#فجيج_تقرا_وتفهم
#اعتذري_يا_أميمة_رشدي
#فجيج_بلاد_الثقافة
