بيوغرافيا : بنكيران مسار حياة رجل
عبد الإله بن كيران، 62 عام، فاسي قحّ، تزاد و كبر فالرباط، شدّ الباك ديالو من ثانوية مولاي يوسف ف 1973، من موراها الإجازة فالفيزيك 1979، ست سنين وهو فيها عاد شدّها كان تيضوبل…..
فنفس العام غادي يتعيّن أستاذ فمدرسة تكوين الاساتذة فالرباط اللي غادي يخدم فيها تسع سنين قبل ما يقدّم إستقالتو و يخرج يدير مطبعة و جوج مدارس خاصة، ديك الساعة الخلصة ديال أستاذ كانت شي ربعين ألف ريال فالشهر راك فاهم احنيني …
بن كيران من صغرو و هو مبلي بالسياسة، ما خلاّ فين مشا، فالأول كان يساري، أييه، كان متعاطف مع حركة 23 مارس، شويا هو يمشي للشبيبة ديال الإتحاد الإشتراكي ما بانش لو معاهم طرف الخبز و هو يمشي لحزب الإستقلال.
بقا تينقّز من جهة لجهة حتّا شاف القضية ما غاداش كيف ما تيتمنى، و هو يأسس حركة الجماعة الإسلامية ف 1986بشكل سرّي، ساق البصري لخبار وهو يحيح عليه بدا تيجمع فبنادم، إعتقل بزاف منهم فمكناس.
بن كيران تزاد معاه الزايد والخفافيش و هو يقول بلاّتي، أرا نبدّل السمية لهاد الحركة و تكون مُرّخصة و بالقانون، ناض سمّاها حركة الإصلاح و التجديد ف 1988 و بقا هو الرئيس، إعترفت بها للدولة ف 1990 بالنظام الملكي و بإمارة المومنين يعني بالعربية تاعرابت ولّى ديالهوم وتحت قبضة البصري رحمه الله .
بن كيران باش يزيد يطلق عروقو وسط الإسلاميين دالمغريب، جمع كاع الحركات اللي كانت ديك الوقت السرية و العلنية و دارو حركة وحدة سمّاوها حركة التوحيد و الإصلاح اللّي تتسمعو بيها كاملين و بقا هو الرئيس ديالها من 1992 إلى 1996 هنا ولّى يزعم بن كيران وبانوا ليه الأبواب حاول يقدّم طلب لوزارة الداخلية باش يدير حزب التجديد الوطني، ترفض ليه الطلب و هو يمشي عند عبد الكريم الخطيب اللي كان داير حزب سميتو الحركة الشعبية الديمقراطية الدستورية و ولّى عضو فالأمانة العامة ديالو.
هاد الحزب اللي غادي يختفي ف 1998 و يولّي بلاصتو حزب عجيب غريب و اللّي داير فينا هاد الحالة كاملة سميتو حزب العدالة و التنمية أو ال PJD.
بإسم هاد الحزب ربح بن كيران ثلاث دالمرات متتالية مقعد فالبرلمان، ف 97 و 2002 و 2007 و المرّة الرابعة طار نيشان لرئاسة الحكومة من بعد الحراك ديال 2011 اللّي ركب عليه و تغيّر الدستور باش يولّي هو أول رئيس حكومة فالمغريب من بعد ما كان عندنا غير وزير أول.
بن كيران إلى رجعتي لليوتيوب و سمعتي شنو كان تيقول قبل 2011 و من بعد ما ولّى رئيس حكومة غادي تعرف بأننا أمام شخص غير عادي، ذكي بزااف، عارف اش تيدير، نقدر نسمّيه القافز الأول فالمملكة، تفوّق بأساليبوا الذكية …
حيت من لاشيئ، من موظف بسيط لمالك أكبر مطبعة فالرباط و جوج مدارس خاصة و دابا جوج فيلات الله يبارك و مرسديس و هدايا و إمتيازات لا تُعد و لاتحصى، واش قافز و لا ماشي قافز يا متعلّمين يا بتوع المدارس….. يا فرفارة
من بعد ما شد رئاسة الحكومة و فواحد اللقاء موثّق فيوتيوب في سلا قاليهم أنا يستحيل ولادي يخدمو فالدولة أو نستغل المنصب ديالي باش يخدمو فوظائف حكومية، لكن سبحان الله ولدو رضوان إستافد من منحة شهرية ديال خمسالاف درهم باش يقرا في فرنسا واخا ما محتاجش ليها حيت تيقرا مزيان، و بنتو سوميّة توظفات فوزارة الضحّاك كإطار من بعد ما دوّزات كونكور بحالها بحال الناس و نجحات حيت حتّا هي تتقرا مزيان.
عبد الإله بن كيران معلّم، و تنرفع ليه القبعة، حيت دار كلشي باش ينقد راسو، جرّب اليسار و اليمين، خدم بركاك للمخزن، تعاون مع البصري ضد أصحابو فالفكر و المرجعية، بن كيران إنسان عملي تيشوف اللّي تسلّكو، جرّب يتاجر بالدين فالخمس السنين الاخيرة و صدقات ليه، هنيئا له.
